Logo Wandzeitung
Herausgeber: Guido Blumer & Roger Rutz.
Archiv:   Blog:   Echo:   Home:   Kontakt:   Leitbild:   Partner:   Sponsoren:   Twitter

«Wandzeitung» vom 24.7.2018:

Os de Noochberschaft:

Em Chueret sin Somme (1).

DPfewanttschaft isch of de schwarze Siite xee. De Chueret het de Chopf gschöttlet, wo de Ggusään sich probiert het am Bächli hene omzbringe, uusgrechnet vo some chline Bröggli abe, womer höchschtens hett chöne s Bee breche. Ond er het sichs denn au proche. De Chueret het zwor au sini schwarze Zyte gkaa. Irgendwenn sind em die aber verläädet. Er het gfonde, öber dSchöpfig, vo wem au immer si sei, sött me si freue. Ossert öber d Mentsche. Die seied aber nüd zom Blaare, sondern zom Lache.

De Ggusään het sech hendersinnet ghaa weg de Scheidig. Es joorelangs Theater, Rosechrieg vom Feinschte. De Gusään ond sine Frau sind sich abwechsligswiis bim Chueret go uusblaare, was de oder di ander för es nützigs Tuech sei. D Famili het möse e KOFA öber sich ergoo loo. Wenn de Chueret das usdüütschet hett – kompetenzorientierti Familienärbet – hets en gschöttlet vor Lache. D Sozialinduschtrie het sech zeme mit den Awält am Ggusään saniert. De Chueret hett gfonde, s Verdinge wär besser als die zeetuusige vo Franke zom d Chend vo de Alte erne Giftete wider is Loot wörge. E KOFA-Frau het em drofabe Nazi usstäält. De zweit Tääl vom sim Satz – binere guete Pflegfamili – hett si nüd wöle ghööre.

De Chueret ghet gment en Nazi sei er nüd, wilz de Puur nüd, aber er werdis no, wenn die Hüüchelei i de Gsellschaft wiiter giengi. Ond das so ne Chue en aaschwerzi sei em eigentlich en Eer. Früener heied em Betschwöschtere in Senkel gschtellt, hüt segs die taaseleti politischi Korrektheit. Me dörf nütz me säge ohni dass nüd näberd betupft sei. Dromm söll si säge was si well. Er heg immerhin en Art e Tschendedebatte do obe aagreiset. De Inhalt sei zwor piinlich, aber de Lüüt teis guet, wenn do mal chli näbis gängi. Bi em heis do weniger z goo. Er mös liberement nüd Gliichberechtigung hüüchle, damit eeni en zobed anelesi. Er isch en Hageschtolz xee.

De Noochber het i de beschte moderne Architektur en Wentegaarte a sis Puurehuus anebaue. De Architekt isch sogär im Hochparteerre globt worde. Vo liechtdörflueteter Transparenz als Kontrascht zo de graue, schteenige Masse vom Berg hends gschrebe. Ond de Noochber het im ganze Chrache brällelet mit dem. ZObed het er d Liechtdörfluetig ondestreche ond all Lampe azönt. Mengmol isch di ganz Famili barefödle im Wentegaarte ometurnet. Vom Chueret sinere Schtobe het me gad öbere xee. De Chueret het da möse aaluege, wenn er zom Fenschter usgluegt het, wenns au erber wiit ewegg xee isch – de Schtreusidlig sei Dank. Wo d Noochbüüri da gmerkt het, hett si näbis aagläät ond Schlötterlig öberegruefe. Am andere Tag het er es Gkifel ghört vom Noochberhuus. D Noochbüri ond de Architekt hend gschtrette, das mes witome ghöört het. Woorschinli öber Kontrascht ond Transparenz. Veschtande het me s nüd. Amene Mektig hets scheussliche graui Schalusiie am Wentegaate ghaa. Nütz me vo Transparenz ond Kontrascht. Ond dNoochbüri het all no giftig glueget wenns en näbe xee het. De Chueret het denn emool zonere xäät, er heg denn au en Feldschtecher. Sie hets nüd erber loschtig gfonde.

Wenn er es Wort nüd veschtönd, schriibed im Blog, i erklärs eu denn.


Adrian Ramsauer,
9.8.2018, 117. Jahrgang, Nr. 221.

Artikel als PDF downloaden

Standpunkte:

25.7.2018, 21:09 Uhr.

Chueret schrieb:

Es handelt sich übrigens nicht um den 1., sondern um den 2. Teil meines Sommers, der erste folgt noch


25.7.2018, 21:06 Uhr.

De Chueret schrieb:

erber = ziemlich, sehr
wilz de puur nüd = tatsächlich nicht
taaseleti = vetaaseleti = verdammte


25.7.2018, 10:20 Uhr.

av schrieb:

erber?
wilz de puur nüd?
taaseleti?


Veröffentlichen Sie Ihren

Standpunkt*:

Verbleibende Zeichen: 777 von 777

Name:

*Wir freuen uns sehr über Ihre Gedanken zum Text des Tages, bitten Sie jedoch, keine Personen zu verunglimpfen und deren Haltung mit Respekt zu begegnen. Danke schön. Verstösse gegen unser Leitbild werden indes nicht verbreitet.

 

Winterthurs kleinste Zeitung der Schweiz.